الناس اللي عندها كلاب او بتحب الكلاب... دقيقه من فضلك ... موضوع شيق للغاية

الناس اللي بتربي كلاب... دقيقه من وقتك

 

- اولا حضرتك لازم تعرف ان تربيه الكلب زيه زي لامؤاخذه الطفل.. سواء كان اهتمام و رعايه صحيه و أكل وحاله نفسيه كمان

- لو مش قد مصاريف تربيه الكلب يبقي متشتريش كلب ولا حتي تاخد كلب جايلك هديه

- الكلب مش مجرد حيوان cute في البيت تفرح بيه وتتمنظر بيه عشان تقول انا عندي كلب!

- الكلب مش مجرد لعبه زي الدبدوب الصغير تجبها وتلعب بيها ولما تزهق منها ترميها في الشارع

- لو هتجيب كلب عشان تربيه فوق سطوح بيتكم والشمس تاكل جسمه في الصيف والبرد ياكل عضمه في الشتا يبقي بلاش تربي كلب

- لو خُلقك ضيق بلاش تربي كلب لانه في البدايه هيعمل حمام في اي حته تعجبه لانه لسه متعودش وعشان تعوده علي مكان مخصص هياخد شويه وقت

- لو مش هتعرف تفضي نفسك ساعتين في اليوم تلعب فيهم مع الكلب وتخرج الطاقه اللي جواه يبقي بلاش تربي كلب

- لو هتجيب كلب عشان تربيه ولما تزهق منه تسيبه في الشارع او تديه لحد من صحابك... يبقي بلاش تربي كلب

- لو مش قد انك تراعي كلبك لما يكبر في السن ويبقي عجوز وحركته تقل ويبقي معظم يومه نوم وكسل ويعمل حمام في اي حته يبقي بلاش تربي كلب

- لو ظروفك الماديه علي قدها ويدوب بتكفي نفسك... انصحك بلاش تشتري كلب او حتي تتبني كلب ولو جالك كلب هديه ارفضه ... الكلب عاوز مصاريف... اكل و علاج و تطعيمات ومتابعه مع دكتور كل فترة 

 

- لو مش قد مصاريف الكلب من أكل و شرب و علاج و انك تخرجه كل يومين تفسحه يبقي بلاش تربي كلب

- لو هتجيب كلب عشان تشرسه وتتمنظر بيه.. يبقي بلاش تشتري كلب..

- ثق تماماً انك لو شرست الكلب هيجي يوم وهتفقد السيطره عليه وهيتسببلك في مشاكل انت في غني عنها

- الحاله الوحيده اللي ممكن تشرس فيها الكلب لما تكون حضرتك عندك مصنع او فيلا وخايف تتسرق... غير كده لأ... لأ... لأ

- كورسات الشراسه ليها اماكن وناس متخصصه ولازم بيكون معاها تدريبات طاعه و اوامر عشان تقدر تتحكم في الكلب تحت اي ظرف 

 

- انك تحبس الكلب ف اوضه ضلمه لمده اسبوع وتجيب اصحابك يضربوا الكلب عشان يتشرس ده تخلف...انت كده بتعلم الكلب الخوف وانه يهجم علي اي حاجه هو خايف منها حتي لو كان طفل صغير قدامه.... انت كده بتغيير سلوكه والفطره اللي ربنا خلقه عليه وبتخلق وحش مش هتعرف تسيطر عليه نهائي.

- انك تمشي تتمنظر بالكلب بتاعك في الشارع وتتحامي فيه.. دي مش شطاره... دي خيبه وتخلف وجهل ويدل علي إنك محدث نعمه

- ربنا خلق كل حيوان له فطرته و سلوكه...متجيش انت تغير الفطره اللي ربنا خلقه عليها وتحولها لكائن مسخ شرس عنيد وافتكر دايماً انها مش شطاره منك... بالعكس ده قمه التخلف

- الكلاب من اوفي وانضف المخلوقات اللي ممكن تقابلها... اخلاصهم و وفائهم ملوش حدود.. الكلب بيعتبرك انت كل عيلته ومحور اهتمام رئيسي في حياته.... فمن الطبيعي انك انت كمان لازم تبادله نفس الاحساس :-)

 

طالما قررت انك تربي كلب يبقي لازم تعامله كأنه ابنك او بنتك حرفياً